主持人：嗯，咁有啲既狀況就可以即係透過計劃去避開啦，即係話例如頭先話隧道咁樣既，就唔揸入隧道咁樣啦。好喇咁但係例如搭lift咁樣幽閉喇，就係一啲突發既事件喇，真係發生嗰陣時呢，其實見到有呢個恐懼症既患者呢，佢嗰個反應會係點樣既呢？會係即係好除咗即係心理上好驚之外，係咪生理上都會好大既反應？
精神科專科醫生陳蔓蕾醫生：會㗎，譬如好似心跳啦、手震啦、透唔到氣啦。有其實實際上就並唔係透唔到氣呢，因為焦慮既過程會導致個病人會唞氣好急促，以為自己唞唔到氣，咁就產生一個叫過度換氣既情況。咁當我過度換氣既時間，就會將我哋既二氧化碳過分咁呼出啦，咁令到身體個酸鹼度就失衡。咁身體呢，就會冇辦法正常咁運作。最常見就係手腳冇晒力啦，甚至手啊腳都抽筋都會㗎。咁心會跳得好快啦。不過呢個心跳加速既情況同埋瞳孔放大、睇嘢好朦啦呢啲都係同我哋既腎上腺素分泌有關。呢一兩個症狀呢，通常大約10分鐘之後就會消失㗎喇。咁但係因為個病人呢一路都係好驚，處於個驚恐既狀態，覺得自己會死啊、覺得自己會失救啊呢啲情況，會令到佢唞氣個過度換氣既情況不斷咁持續。咁所以有啲病人就會話，醫生，其實啊我點止十分鐘啊嗰啲腎上腺素過晒啦咁樣。但係實際上係因為過度換氣既時間呢，令到個病徵一路都持續㗎。
香港中華醫學會會診日
主題：廣場恐懼症和幽閉恐懼症
嘉賓：陳蔓蕾醫生(精神科專科醫生)
主持: 葉韻怡,虞逸峯
香港電台第一台 精靈一點