主持人：嗯，咁會唔會呢，有人係同時有呢一個廣場同埋幽閉恐懼症㗎？
精神科專科醫生陳蔓蕾醫生：有可能㗎，因為聽落好似相反，但係其實佢哋核心恐懼都係驚走唔到啦，同埋驚嗰個環境既，係將嗰個環境同焦慮掛鉤咗咁，所以佢好多環境都可以同時間驚個呢。咁又有機會有廣場恐懼症啦，同時亦都有機會有幽閉恐懼症㗎。
主持人：嗯，咁我嚟不如試下用幽閉恐懼症做例子喇。咁我相信大家可能會嚟到例如係搭𨋢啊，韞𨋢就係一個比較典型既場景咁樣啦。咁如果係講緊有恐懼症既，係真係去到幽閉嗰陣時啊，就會突然間好驚，定還是影響度係我基本上行入個𨋢度我都會有啲即係驚啊或者有啲擔心喺度會唔會係咁既呢？
精神科專科醫生陳蔓蕾醫生：其實如果睇下佢個情況有幾嚴重啦。如果係一啲好嚴重既病人，都有機會㗎，呢個叫做anticipatory anxiety，是一個預期的焦慮。咁就算嗰個病人係未開始做嗰件事，只要嚟起佢將會要做嗰樣嘢呢，其實都會引起焦慮個噃。咁當然啦，如果搭lift呢啲情況呢，就因為個病人呢要係好嚴重，佢先至會真係搭唔到lift既。通常入去就係驚驚哋咁樣咯。
主持人：嗯，我都有聽過朋友講呢，佢係揸唔到車係過隧道個咯。因為一個隧道呢，佢嗰種既感覺呢就係奇差，直情係試過要停低架車咁，跟住即係要落車離開呢一個既情況咯。係咪呢一個如果咁樣形容既程度都相對嚟講係比較嚴重啦。
精神科專科醫生陳蔓蕾醫生：如果係咁都好嚴重㗎，因為如果你揸車要停喺隧道當然啦，遇到既問題當然係會好大啦。嗯，不過一般嚟講呢，啲病人會知道自己要揸車過隧道呢，佢哋直就索性就唔揸㗎喇係啊。後期佢直情係避開咯，即係一係就搭車如果可以經唔經隧道既道路既話，佢就會行嗰條路咯。係啊，所以其實佢哋可能會兜山路咯。譬如如果經獅子山隧道咁佢可以行大埔道啦。係喇，可以行大埔道啦。嗯，所以其實都好影響個病人既生活既，因為我哋本身好便捷既生活方式就變得好麻煩咯其實。
香港中華醫學會會診日
主題：廣場恐懼症和幽閉恐懼症
嘉賓：陳蔓蕾醫生(精神科專科醫生)
主持: 葉韻怡,虞逸峯
香港電台第一台 精靈一點