主持人：嗯，咁好喇咁，如果今日我哋講緊既廣場恐懼症同埋幽閉恐懼症係咪都真係顧名思義，即係會帶嚟恐懼感既，就係一啲好廣闊既地方，又或者調返轉好狹小既地方，係咪純粹係一個空間上既問題啊，定還是係一啲概念上既影響嚟既呢？
精神科專科醫生陳蔓蕾醫生：其實呢，都係個概念上有影響嚟既。咁呢個廣場恐懼症呢，其實源自一個西方既地方嚟出嚟既。咁因為外國個地方係好空曠啦，咁所以啲人就會驚啊，如果我去一個好空曠既地方，或者我喺屋企附近完全冇人既情況底下，咁我失救咪冇人咪冇人知道咯，就會覺得好驚。不過當然啦，喺香港人煙稠密既地方，我哋就好少會去到廣場呢個咁既定義喇。咁就轉化為咗呢一個，我哋好似周邊冇一個熟人喺度，然後呢，如果萬一我失救有咩事既話呢，周邊既人只係睇住，就咁望住圍住你望，完全唔幫手，咁呢一個呢就係一個核心既恐懼咁。另外幽閉恐懼症，其實主要就係講一啲密閉空間啦。其實好多泛指一啲佢見唔到有窗戶既地方或者打開唔到門既地方，咁就係一個幽閉恐懼症既位置。咁主要既核心恐懼呢，就係驚喺嗰個地方唞唔到氣啦，或者走唔到或者會窒息咁樣既。
香港中華醫學會會診日
主題：廣場恐懼症和幽閉恐懼症
嘉賓：陳蔓蕾醫生(精神科專科醫生)
主持: 葉韻怡,虞逸峯
香港電台第一台 精靈一點