主持人：今日我請嚟精神科專科醫生陳蔓蕾醫生，同我哋講解一下。你好，陳醫生！陳醫生，先講一件事，好多人瞓覺瞓到一半，話俾鬼砸/壓呀，佢哋話好似好清醒，但係手腳完全動唔到，我覺得好恐怖！仲有啲話似靈異事件，醫學上點樣解釋呢？
嘉賓陳蔓蕾醫生：其實呢個叫睡眠癱瘓症。喺解釋之前，要同大家講吓睡眠嘅基本結構先。我哋睇吓呢個圖：我哋睡眠結構係咁嘅——首先有清醒嘅時間，跟住會進入淺層睡眠。呢個時候，我哋嘅腦電波會慢慢減慢，聽到嘅聲音會開始有啲模糊，但其實好細嘅聲都仲聽到。手腳都可以郁動。跟住會逐步進入深層睡眠，腦電波會再慢啲，聽到嘅聲音會更加模糊，手腳郁動嘅幅度會細咗。